საერთაშორისო ბაკალავრიატის (IB) დაწყებითი საფეხური პროგრამა (PYP) 3-12 წლის მოსწავლეებისთვის არის განკუთვნილი და მსოფლიო ლიდერია მომავალზე ორიენტირებული, დროგამძლე განათლების მიმართულებით. პროგრამის მიზანია მზრუნველი, აქტიური ახალგაზრდების აღზრდა და მათთვის სწავლის სიყვარულის განმტკიცება, რომელიც მთელი ცხოვრების განმავლობაში გაჰყვებათ.

კვლევასა და რეფლექსიაზე დაფუძნებული სწავლების გზით, PYP-ის მოსწავლეები ცოდნას, კონცეპტუალურ გაგებას და IB მოსწავლის პროფილისთვის დამახასიათებელ უნარებსა და ატრიბუტებს იძენენ, რათა პოზიტიური ცვლილებები განახორციელონ როგორც საკუთარ ცხოვრებაში, ისე ზოგადად, საზოგადოებაში.

IB მოსწავლის პროფილი ადამიანის გუნება-განწყობილების შესაძლებლობებისა და თვისებების ფართო სპექტრს ასახავს, რომელიც ინტელექტუალურ, პიროვნულ, ემოციურ და სოციალურ ზრდას უზრუნველყოფს. მასწავლებლები, სკოლის ადმინისტრაცია და მშობლები – სასწავლო საზოგადოების ყველა წევრი პასუხისმგებელია IB-ს მოსწავლის პროფილის ატრიბუტების განვითარებაზე.

საერთაშორისო ბაკალავრიატის მოსწავლე მიისწრაფვის, რომ იყოს მკვლევარი, მცოდნე, მოაზროვნე, კომუნიკაბელური, პრინციპული, გონებაგახსნილი, მზრუნველი, გაბედული, გაწონასწორებული და რეფლექსიური.

IB მოსწავლის პროფილის შესახებ მეტი ინფორმაციისთვის ეწვიეთ ბმულს

PYP-ის სასწავლო პროგრამა მოსწავლეზე ორიენტირებული,  ტრანსდისციპლინური, კვლევაზე დაფუძნებული და კონცეპტუალურია, რომელიც პასუხისმგებლობიან ქმედებას პროგრამის ცენტრში ათავსებს და საგნებს როგორც ტრადიციულ საზღვრებში, ისე მათ ფარგლებს გარეთ შეისწავლის.

სწავლა-სწავლების მიდგომები გამყარებულია იმის გაცნობიერებით, თუ როგორ სწავლობენ მოსწავლეები. ბუნებრივი ცნობისმოყვარეობის, გამოხატვის თავისუფლებისა და ინდივიდუალური დამსახურების პატივისცემის გზით, დაწყებითი საფეხურის პროგრამა მოსწავლეების აკადემიური, სოციალური და ემოციური კეთილდღეობის განვითარებას ისახავს მიზნად.

დაწყებითი საფეხურის პროგრამის (PYP) ფარგლებში, მოსწავლეები საგნების ტრადიციულ საზღვრებს მიღმა, რეალურ სამყაროში არსებულ პრობლემებს იკვლევენ. კვლევით სწავლებაზე დაფუძნებული პროგრამა ექვსი ტრანსდისციპლინური თემის შესწავლას აერთიანებს:

1. ვინ ვართ ჩვენ

2. სად ვართ დროსა და სივრცეში

3. როგორ გამოვხატავთ საკუთარ თავს

4. როგორ მუშაობს სამყარო

5. როგორ ვუწევთ საკუთარ თავს ორგანიზებას

6. პლანეტის გაზიარება

IB სასწავლო გეგმის ფარგლებში, მოსწავლეები თანამედროვე ტექნოლოგიების ინსტრუმენტებს რეალური პრობლემების გადასაწყვეტად იყენებენ. მოსწავლეები ეუფლებიან ტექნოლოგიების გამოყენებას, იძენენ ტექნოლოგიების შესახებ ცოდნას და სწავლობენ ტექნოლოგიების დახმარებით.

თვითავტონომია, თვითეფექტიანობა და მოქმედება PYP-ში სწავლის ფუნდამენტია:

თვითავტონომია: სასწავლო პროცესის განმავლობაში, მოსწავლე როგორც საკუთარი, ისე სხვების სწავლების აგენტია. როდესაც მასწავლებლები თვითავტონომიისა და თვითეფექტიანობის მნიშვნელობას აცნობიერებენ, მოსწავლეები  სასწავლო პროცესში პარტნიორები ხდებიან.

თვითეფექტიანობა: რაც უფრო ძლიერია მოსწავლეებში თვითეფექტიანობის განცდა, მით უფრო დიდია იმის ალბათობა, რომ ისინი გამოავლენენ თვითავტონომიას. თავდაჯერებული მოსწავლეები მონაწილეობენ სასწავლო პროცესში და აქტიურად მოქმედებენ სასწავლო საზოგადოებაში.

მოქმედება: ინდივიდუალური და კოლექტიური მოქმედებით, მოსწავლეები იმ პასუხისმგებლობებს აცნობიერებენ, რომლებიც დაკავშირებულია საერთაშორისო აზროვნებასთან და ერთობლივი მიზნისთვის, კოლექტიური შრომის სარგებლის დაფასებას სწავლობენ. მოქმედება, რომელიც არსებითია თვითავტონომიის უნარის განვითარებისთვის, PYP-ის განუყოფელი ნაწილია და საერთაშორისო აზროვნების ჩამოყალიბების ყოვლისმომცველი შედეგის მიღწევას ემსახურება.

დაწყებითი საფეხურის პროგრამის ბოლო წელს, მოსწავლეები PYP გამოფენაში მონაწილეობენ და მათთვის საინტერესო და მნიშვნელოვანი საკითხს ან შესაძლებლობას იკვლევენ, ასაბუთებენ და სხვებს უზიარებენ.  თვითავტონომიურობისა და კვლევაზე დაფუძნებული სწავლების მნიშვნელობის ხაზგასმით, PYP გამოფენა მოსწავლეებს სწავლისთვის აუცილებელი უნარებისა და პიროვნული თვისებების ჩამოყალიბებაში ეხმარება და ამზადებს მათ გახდნენ პასუხისმგებლობიანი, ცნობისმოყვარე და მცოდნე მსოფლიო მოქალაქეები.

გამოფენისთვის მზადების პროცესში, მოსწავლეები დამოუკიდებლად აყალიბებენ კითხვებს, ადგენენ კვლევის გეგმას და აქტიურად ეძიებენ ინფორმაციას სხვადასხვა წყაროებიდან. კვლევაზე დაფუძნებული სწავლების პროცესი ახალისებს ცნობისმოყვარეობას, ხელს უწყობს დამოუკიდებელ აზროვნებას და მოსწავლეებს მეცნიერების სხვადასხვა სფეროებს შორის კავშირების დამყარებას მოუწოდებს.

კვლევის პროცესში სხვებთან თანამშრომლობა  მოსწავლეებს თვითმართვის უნარების განვითარებაში ეხმარება, რაც საკუთარ სწავლებაზე პასუხისმგებლობის აღების, ინფორმირებული გადაწყვეტილებების მიღებისა და სასწავლო საზოგადოებაში წვლილის შეტანის შესაძლებლობას უზრუნველყოფს.

PYP-ის ტრანსდისციპლინური მოდელი სასკოლო ცხოვრების სამ საყრდენს ეფუძნება: მოსწავლე, სწავლა და სწავლება და სასწავლო საზოგადოება.

PYP-ს სასწავლო გეგმა აგებულია იმ წინაპირობაზე, რომ მოსწავლეები საკუთარი სწავლების აგენტები და სასწავლო პროცესში პარტნიორები არიან. იმის გაცნობიერება, თუ როგორ სწავლობენ მოსწავლეები, ფუნდამენტურია სწავლისა და სწავლების კვლევაზე დაფუძნებული, კონცეპტუალური და ტრანსდისციპლინური მოდელისთვის. PYP-ს სჯერა მოსწავლეების პოტენციალის გამოიკვლიონ, დასვან შეკითხვები, დაინტერესდნენ და იმსჯელონ საკუთარი თავებზე, სხვებზე და მათ გარშემო არსებულ სამყაროზე.

დაწყებითი საფეხურის პროგრამა (PYP) უზრუნველყოფს, რომ სასწავლო პროცესი იყოს საინტერესო, რელევანტური, გამოწვევებით სავსე და მრავალმნიშვნელოვანი. PYP-ის სასწავლო გეგმა IB განათლების ფუნდამენტურ, საერთო მახასიათებლებს აერთიანებს, კერძოდ:

IB ცოდნის მაძიებლების მსოფლიო საზოგადოებას აერთიანებს, რომელთაც სჯერათ, რომ განათლებას კავშირების გაბმა და უკეთესი, უფრო მშვიდობიანი სამყაროს შექმნა შეუძლია. IB-ს სასწავლო საზოგადოება სწავლის ყველაზე ფართო კონტექსტად სამყაროს განიხილავს.

სასწავლო საზოგადოებაში მოიაზრება ყველა, ვინც სასკოლო ცხოვრებაში მონაწილეობს: მოსწავლეები და მათი ოჯახის წევრები, სკოლის თანამშრომლები და ის პირები, რომელთაც როგორც მოსწავლის ცხოვრებაში, ისე საზოგადოებაში მნიშვნელოვანი როლი აკისრიათ. კვლევის, მოქმედებისა და რეფლექსიის ციკლის მეშვეობით, რომელიც სასწავლო პროცესის ცენტრში ათავსებს მოსწავლეს, PYP კრიტიკული და შემოქმედებითი აზროვნების ჩამოყალიბებას უწყობს ხელს.

დაწყებითი საფეხურის პროგრამა (PYP) მოსწავლეებს ეხმარება განივითარონ:

1. ცოდნა, კონცეპტუალური გაგება და სწავლისადმი მიდგომები;

2. საერთაშორისო აზროვნება;

3. IB მოსწავლის პროფილის ატრიბუტები.