საერთაშორისო ბაკალავრიატის დამამთავრებელი საფეხურის პროგრამა (DP) 11-12 კლასის მოსწავლეებისთვის არის განკუთვნილი და შემუშავებულია მათი ინტელექტუალური, სოციალური, ემოციური და ფიზიკური კეთილდღეობის გასავითარებლად. პროგრამის ფარგლებში, მოსწავლეები ტრადიციულ აკადემიურ დისციპლინებს ერთმანეთთან აკავშირებენ და მიღებულ ცოდნას რეალური პრობლემების გადასაჭრელად იყენებენ, უნიკალური „ცოდნის თეორიის“ კურსის  ფარგლებში, ცოდნის არსს უღრმავდებიან და აკადემიურ დისციპლინებსა და სამყაროს შორის კავშირებს იკვლევენ. გარდა ამისა, DP-ს კურსდამთავრებულები გონებაგახსნილ და ტოლერანტ ადამიანებად გვევლინებიან, რომლებიც კულტურულ მრავალფეროვნებას აფასებენ და განსხვავებულ მოსაზრებებს სცემენ პატივს.

IB მოსწავლის პროფილი სასწავლო პროცესის ცენტრში ათავსებს მოსწავლეებს და მათი პრაქტიკული უნარ-ჩვევების განვითარებას ისახავს მიზნად. IB მოსწავლის პროფილში შემავალი 10 ატრიბუტის განვითარება, გლობალურად მოაზროვნე ადამიანების ჩამოყალიბების საფუძველია, რომლებსაც სამყაროს უკეთესობისკენ შეცვლა შეუძლიათ.

IB-ს მოსწავლეები მიისწრაფვიან, რომ იყვნენ: მკვლევრები, მცოდნეები, მოაზროვნეები, კომუნიკატორები, პრინციპულები, გონებაგახსნილები, მზრუნველები, გაბედულები, გაწონასწორებულები, რეფლექსიურები.

IB მოსწავლის პროფილის შესახებ მეტი ინფორმაციისთვის ეწვიეთ ბმულს

DP-ს სასწავლო პროგრამა სამი ცენტრალური საგნისგან და ექვსი საგნობრივი ჯგუფისგან შედგება. ცენტრალური საგნების მიზანია მოსწავლეების გამოწვევა და მათთვის საგანმანათლებლო არეალის გაფართოება, რათა წარმატებით გამოიყენონ მიღებული ცოდნა და უნარები რეალური პრობლემების გადასაჭრელად. 

DP-ს მოქნილი პროგრამა მოსწავლეებს შესაძლებლობას აძლევს ფოკუსირდნენ აკადემიურ დისციპლინებზე და ამასთან, განავითარონ საკუთარი შესაძლებლობები. მსოფლიოში საუკეთესოდ აღიარებული სასწავლო პროგრამის წყალობით, მოსწავლეებს უდავო უპირატესობა ენიჭებათ სასურველ უნივერსიტეტში ჩასაბარებლად და კარიერული წარმატების მისაღწევად.

ცოდნის თეორია (TOK), სადიპლომო ნაშრომი (EE) და კრეატიულობა, აქტივობა, სერვისი (CAS) საერთაშორისო ბაკალავრიატის® დამამთავრებელი საფეხურის პროგრამის ყველა მოსწავლისთვის სავალდებულო  საგნებია.

ცოდნის თეორია (TOK) „საიდან ვიცით ის, რაც ვიცით?“ – TOK მოსწავლეებს ცოდნის არსზე დააფიქრებს და კრიტიკული აზროვნების ჩამოყალიბებას უწყობს ხელს, რაც მოსწავლეებს საკუთარი გამოცდილებების გაცნობიერებაში ეხმარება. „ცოდნის თეორია“ მოსწავლეებს როგორც საკუთარი მოსაზრებების გაზიარებას, ისე სხვების მოსმენასა და ახალი ცოდნისა და გამოცდილების მიღებისკენ მოუწოდებს.

კრეატიულობა, აქტივობა, სერვისი (CAS) პრაქტიკულ გამოცდილებაზე დაფუძნებული სწავლების გზით, „კრეატიულობა, აქტივობა, სერვისი“ (CAS), მოსწავლეებს პიროვნული და ინტერპერსონალური განვითარების შესაძლებლობას აძლევს. CAS-ის პროექტები მოსწავლეებისთვის ერთგვარი გამოწვევაა, გამოავლინონ ინიციატივა, გამოიჩინონ შეუპოვრობა და განავითარონ ისეთი უნარები, როგორიცაა თანამშრომლობა, პრობლემების გადაჭრა და გადაწყვეტილების დამოუკიდებლად მიღება. CAS-ის ინდივიდუალური და ამავდროულად, კოლაბორაციული ხასიათი, მოსწავლეებს საშუალებას აძლევს ისიამოვნონ როგორც პროცესით, ასევე მიღწეული შედეგით.

სადიპლომო ნაშრომი (EE) დამოუკიდებელი კვლევითი პროცესია, რომელიც 4000 სიტყვიან ესეში ჯამდება. EE მოსწავლეებს მათთვის საინტერესო თემის სიღრმისეულად გამოკვლევის შესაძლებლობას სთავაზობს და DP-ს ექვსი საგნობრივი ჯგუფიდან ერთ-ერთს ეფუძნება. სადიპლომო ნაშრომის შექმნის პროცესში, მოსწავლეებს ისეთი უნარ-ჩვევები უვითარდებათ, როგორიცაა საკვლევი თემის საკვანძო კითხვის ფორმულირება, დამოუკიდებელი მოკვლევის წარმოება, იდეების გადმოცემა და არგუმენტების განვითარება.

DP-ს სასწავლო პროგრამა 6 საგნობრივი ჯგუფისგან შედგება, რომლებიც, თავის მხრივ, სხვადასხვა საგნებს აერთიანებენ. DP-ის საგნობრივი ჯგუფებია: ენა და ლიტერატურა, უცხოური ენები, მათემატიკა, საზოგადოებრივი მეცნიერებები, მეცნიერებები და ხელოვნება.

დამამთავრებელი საფეხურის პროგრამა გამორჩეული სტატუსით სარგებლობს მსოფლიოს 1931 უნივერსიტეტში. ყოველწლიურად, DP-ს კურსდამთავრებულები 90-მდე ქვეყანაში, 3300-ზე მეტ უმაღლეს სასწავლებელში განაგრძობენ უმაღლესი განათლების მიღებას. 2023 წელს, „ნიუტონის თავისუფალი სკოლის“ საერთაშორისო ბაკალავრიატის 20-მა კურსდამთავრებულმა, ჯამში 2,700,000 აშშ დოლარის დაფინანსება და 80 მოწვევის წერილი მიიღო ამერიკის შეერთებული შტატების, კანადის, დიდი ბრიტანეთის, გერმანიის, ნიდერლანდების, ესპანეთის, იტალიის,  ბელგიის, ავსტრიის, ჩეხეთის, საფრანგეთისა და უნგრეთის წამყვანი უნივერსიტეტებიდან.

IB აღიარებულია მსოფლიო მასშტაბით როგორც უმაღლესი განათლებისთვის მოსამზადებელი საუკეთესო სასწავლო პროგრამა. IB დიპლომი აღიარებულია საქართველოშიც, „გათანაბრებულია სრული ზოგადი განათლების დამადასტურებელ დოკუმენტთან და იძლევა განათლების შემდგომ საფეხურზე სწავლის გაგრძელების უფლებას“.